ÍA hefur nú ákveðið að hætta við að fá Viðar og því lítur út fyrir að leikmaðurinn fari í Fylki eða verði áfram hjá Selfyssingum.

,,Við drógum okkur út úr þessu máli," sagði Þórður Guðjónsson framkvæmdastjóri knattspyrnudeildar ÍA í samtali við Fótbolta.net í dag.

Skagamenn eru ennþá að leita að liðsstyrk framarlega á vellinum og í morgun kom Samuel Archer til félagsins á reynslu en hann mun meðal annars spila gegn FH í leiknum um 3. sætið á Fótbolta.net mótinu á laugardag.

Samuel getur leikið allar stöður framarlega á vellinum en Skagamenn sáu hann þegar þeir kíktu á leikmenn í Bandaríkjunum í lok síðasta árs hjá Soccerviza, fyrirtæki Joe Funicello leikmanns Þórs.

,,Þetta er einn af þeim sem við sáum í Bandaríkjaferðinni og höfðum áhuga á að skoða frekar," sagði Þórður.

Garðar Bergmann Gunnlaugsson og Jón Vilhelm Ákason gætu verið á leið í aðgerð og það er hluti af ástæðunni fyrir því að skagamenn eru að leita að framherja.

Skagamenn ætla einnig að bæta við sig miðjumanni áður en keppni í Pepsi-deildinni hefst til að fylla skarð Jesper Jensen sem sleit krossband í lok síðasta tímabils.

ÍA mun ekki semja við Iain Williamson sem var á reynslu á dögunum en ekki er búið að taka ákvörðun með Greg McDermott sem var einnig á reynslu fyrr í mánuðinum. Þá eru fleiri miðjumenn einnig í sigtinu að sögn Þórðar.