| lau 06.apr 2024 10:00 Mynd: Fótbolti.net - Hafliði Breiðfjörð |
|
Spá Fótbolta.net - 1. sæti: Valur
Sérfræðingar Fótbolta.net spá því að Valur muni standa uppi sem sigurvegari Bestu deildarinnar í sumar. Álitsgjafar spá í deildina en þeir raða liðunum upp í röð og það lið sem er í efsta sæti fær 12 stig, annað sæti 11 og svo koll af kolli niður í tólfta sæti sem gefur eitt stig. Valsmenn enduðu í efsta sæti í spánni.
Valsmönnum er spáð titlinum.
Arnar Grétarsson stýrir liðinu.
Gylfi spilar með Val í sumar.
Aron Jóhannsson er frábær leikmaður.
Vi har Pedersen!
Hólmar Örn Eyjólfsson.
Púslið sem vantaði.
Birkir Már Sævarsson, ótrúlegur náungi.
Valsmönnum er spáð titlinum.
1. Valur, 139 stig
2. Víkingur R., 135 stig
3. Stjarnan, 111 stig
4. Breiðablik, 109 stig
5. KR, 104 stig
6. FH, 81 stig
7. KA, 66 stig
8. Fram, 60 stig
9. ÍA, 59 stig
10. Vestri, 34 stig
11. Fylkir, 24 stig
12. HK, 14 stig
Um liðið: Valsmenn eru búnir að fá nóg af því að vinna ekki titilinn. Síðasti Íslandsmeistaratitill hjá karlaliðinu kom árið 2020 en breytist það í ár? Valur sendi frá sér risastóra yfirlýsingu er þeir sóttu Gylfa Þór Sigurðsson, sem er besti landsliðsmaður sem Ísland hefur nokkurn tímann átt. Að Gylfi sé að fara í Bestu deildinni er ótrúlegt og það verður mörg augu á Valsliðinu. Pressan er svo sannarlega til staðar og nú er það að duga eða að drepast.
Þjálfarinn: Arnar Grétarsson er á leið inn í sitt annað tímabil sem þjálfari Vals. Árangurinn í fyrra var ásættanlegur en ekki frábær. Nú er krafa á titla. Arnar er með mikla reynslu en eftir að farsælum leikmannaferli lauk, þá var hann yfirmaður fótboltamála hjá AEK í Grikklandi og Club Brugge í Belgíu. Þjálfaraferill Arnars hófst hjá Breiðabliki og síðar tók hann við liði Roeselare í Belgíu áður en hann tók við stjórnartaumum hjá KA þar sem hann skilaði góðu starfi. Hann tók svo við Val fyrir síðustu leiktíð.
Fótbolti.net fær sérfræðingana Einar Guðnason og Harald Árna Hróðmarsson til að rýna í styrkleika, veikleika og annað hjá liðunum sem spila í Bestu deildinni í sumar. Haraldur, sem er fyrrum aðstoðarþjálfari Vals og ÍA, fer yfir það helsta hjá liðinu sem er spáð toppsætinu.
Styrkleikar: Valur er á pappír eitt best mannaða lið sögunnar. Ferilskrár leikmanna og fjöldi landsleikja í hópnum eru svakaleg lesning og nöfnin sem sitja á bekknum eða utan hóps væru lykilmenn í langflestum liðum deildarinnar. Þegar Valur er með boltann eru litlar líkur á að þú fáir hann aftur nema til að taka markspyrnu eða miðju. Það er mikið hungur á Hlíðarenda og þeir ætla sér Íslandsmeistaratitilinn.
Veikleikar: Valsmenn eru með gamalt lið og getubilið milli bestu leikmanna liðsins og þeirra sem koma inn af bekknum er mjög stórt. Varnarleikur liðsins er ekki á pari við sóknarleikinn, þeir vinna boltann ekki nógu oft framarlega á vellinum og jafnvægið á liðinu þegar boltinn tapast er veikleiki.
Lykilmenn: Aron Jóhannsson er með leikskilning og tækni sem á heima á stærra sviði en Bestu deildinni. Hann stýrir hraðanum í leikjum og verður þeirra aðalmaður. Patrick Pedersen er heill eftir tvö erfið tímabil og hann er lang besti framherji deildarinnar þegar hann er heill. 128 mörk í 205 leikjum fyrir Val ef einhver vill þræta við mig um það. Hólmar Eyjólfsson er fyrirliðinn og besti varnarmaður Vals. Hann þarf að eiga topp tímabil í ár og gera menn í kringum sig betri.
Leikmaður sem á að fylgjast með: Gylfi Sigurðsson er mest spennandi nýliði í deildinni sem ég man eftir. Hann var eðlilega ryðgaður gegn ÍA og Víking en ef Gylfi nær sér á strik þarf stórslys til að Valur vinni ekki titilinn.
Komnir:
Gylfi Þór Sigurðsson frá Lyngby
Jónatan Ingi Jónsson frá Sogndal
Bjarni Mark Duffield frá Start
Bjarni Guðjón Brynjólfsson frá Þór
Gísli Laxdal Unnarsson frá ÍA
Jakob Franz Pálsson frá Venezia
Stefán Þór Ágústsson frá Selfossi
Ólafur Flóki Stephensen frá Grindavík (var á láni)
Farnir:
Hlynur Freyr Karlsson til Haugesund
Andri Rúnar Bjarnason í Vestra
Birkir Heimisson í Þór
Orri Hrafn Kjartansson á láni í Fylki
Haukur Páll Sigurðsson orðinn aðstoðarþjálfari
Sveinn Sigurður Jóhannesson
Guy Smit til KR (var á láni hjá ÍBV)
Dómur Haraldar fyrir gluggann: Glugginn hjá Val var eiginlega fáránlegur. Hlynur Freyr fór eðlilega út eftir geggjað tímabil í fyrra og Andri Rúnar fór í Vestra en það var aðeins óvæntara þegar Birkir Heimis fór heim í 603. Haukur Páll fór sem betur fer ekki langt en hans hlutverk innan vallar var ekki stórt í fyrra. Bjarni Mark, Gylfi og Jónatan styrkja liðið gríðarlega og Gísli og Jakob efla breiddina. Fá 9/10.
Leikmannalisti:
1. Frederik A. Schram (m)
25. Stefán Þór Ágústsson (m)
2. Birkir Már Sævarsson
4. Elfar Freyr Helgason
6. Bjarni Mark Duffield
7. Aron Jóhannsson
8. Jónatan Ingi Jónsson
9. Patrick Pedersen
10. Kristinn Freyr Sigurðsson
11. Sigurður Egill Lárusson
12. Tryggvi Hrafn Haraldsson
14. Guðmundur Andri Tryggvason
15. Hólmar Örn Eyjólfsson
16. Gísli Laxdal Unnarsson
17. Lúkas Logi Heimisson
18. Þorsteinn Emil Jónsson
20. Orri Sigurður Ómarsson
21. Jakob Franz Pálsson
22. Bjarni Guðjón Brynjólfsson
23. Gylfi Þór Sigurðsson
24. Adam Ægir Pálsson
Fyrstu fimm leikir Vals:
7. apríl, Valur - ÍA (N1-völlurinn - Hlíðarenda)
14. apríl, Fylkir - Valur (Würth völlurinn)
19. apríl, Stjarnan - Valur (Samsungvöllurinn)
29. apríl, Valur - Fram (N1-völlurinn Hlíðarenda)
6. maí, Breiðablik - Valur (Kópavogsvöllur)
Í besta og versta falli: Í besta falli verður Valur Íslandsmeistari. Í versta falli mun hvert jafntefli, tap eða "slæm" frammistaða í sigrum verða tilefni til gagnrýni. Pressan á liðinu verður meiri en nokkru sinni fyrr og allt annað en 1. sæti verða vonbrigði.
Spámennirnir: Aksentije Milisic, Anton Freyr Jónsson, Arnar Laufdal, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Tómas Þór Þórðarson og Valur Gunnarsson.
