Þessi 35 ára gamli framherji verður laus allra mála hjá Atlético Madríd um mánaðarmótin.

Mörg félög eru með hann á óskalistanum en þar má nefna Inter Miami, Aston Villa og Atalanta.

Brito, forseti River Plate, í Argentínu hefur þá staðfest að félagið hafi boðið Suarez samning en hann á enn eftir að gefa lokasvar.

„Við erum búnir að hafa samband við Suarez en nú er þetta undir honum komið," sagði Brito, en River missir Julian Alvarez til Manchester City á næstu dögum. Man City keypti Alvarez í janúar og lánaði hann aftur til River út júnímánuð.

Það er ekki gefið að River fái Suarez í stað Alvarez. Hann sagði fyrir nokkrum dögum að hann stefnir að því að spila áfram í Evrópu en Steven Gerrard, stjóri Aston Villa og fyrrum liðsfélagi hans hjá Liverpool, ætlar að reyna að lokka hann aftur í ensku úrvalsdeildina.