Grindavík fór með sigur af hólmi gegn Þrótti þar sem gestirnir úr Laugardalnum voru einum færri frá 29. mínútu. „Fær sitt seinna gula fyrir brot á miðjum vellinum fjarri marki. Heimskulegur staður til að brjóta af sér á spjaldi," skrifaði Sverrir Örn Einarsson í beinni textalýsingu um rauða spjaldið sem Guðmundur Friðriksson fékk.

Þrátt fyrir að vera einum færri fengu gestirnir kjörin tækifæri til að komast yfir. Þeir gerðu það hins vegar ekki. Á 79. mínútu kom fyrsta og eina mark leiksins þegar Oddur Ingi Bjarnason skoraði fyrir Grindavík með skalla eftir að skot Sindra Björnssonar hafði farið í slána.

Grindvíkingar áttu í basli gegn tíu Þrótturum, en þeir náðu að lokum að landa sigrinum. Bæði þessi lið töpuðu í fyrstu umferð og er Grindavík því búið að setja sín fyrstu stig á töfluna.

Í hinum leiknum sem var að klárast gerðu Leiknir Reykjavík og Vestri markalaust jafntefli í frekar tíðindalitlum leik. Vestramenn taka þetta stig væntanlega glaðir, en þeir töpuðu sínum fyrsta leik í deildinni gegn Víkingi Ólafsvík. Leiknismenn eru með fjögur stig eftir sigur á Þrótturum í fyrstu umferð.

Grindavík 1 - 0 Þróttur R.
1-0 Oddur Ingi Bjarnason ('79 )
Rautt spjald: Guðmundur Friðriksson , Þróttur R. ('29)
Lestu nánar um leikinn

Leiknir R. 0 - 0 Vestri
Lestu nánar um leikinn

Fjórir leikir hefjast í Lengjudeildinni klukkan 16:00 og verða þeir allir í beinni textalýsingu á Fótbolta.net.