Málin þróuðust þannig að Sævar Atli átti frábært tímabil með Leikni og var seldur til danska félagsins Lyngby í ágúst. Hjá Lyngby hefur Sævar Atli meira og minna verið á bekknum og ekki alveg náð að stimpla sig inn í danska boltann. Hann hefur byrjað tvo leiki og skorað eitt mark.

Fréttaritari ræddi við Óskar Hrafn Þorvaldsson, þjálfara Breiðabliks, í vikunni og bar undir hann slúðursögu.

Sjá einnig:
„Söknum Thomasar, munum sakna Árna ef hann fer og munum sakna Péturs"

Hafið þið boðið í Sævar Atla?

„Nei, það höfum við ekki gert. Við höfum ekki gert það enda þarf Sævar Atli að fá tíma til að koma sér inn í hlutina í Danmörku."

„Við ætlum ekki að vera mennirnir sem eru að reyna snúa honum í einhverjar áttir. Það tekur oft tíma til að koma sér inn í hlutina. Tímabilið í Danmörku var byrjað þegar hann kom, við vonum að hann festi sig í sessi þarna."

„Þetta er góð hugmynd reyndar, en það er ekki okkar að snúa mönnum svona skömmu eftir að þeir eru farnir út."

„Ég held það séu of margir sem séu að banka í axlirnar á mönnum og við þurfum líka að leyfa þessum gaurum sem eru úti, eins gaman og það er að hafa þá á Íslandi, að taka slaginn og rétta þeim ekki alltaf björgunarhringinn um leið."

„Ég veit að Sævar Atli mun gera það og mun vinna þann slag," sagði Óskar Hrafn.