Lengjudeildarliðið Keflavík hirti síðasta lausa sætið í 16-liða úrslitum Mjólkurbikarsins. Keflvíkingar unnu afar öflugan sigur á Breiðabliki þar sem miðjumaðurinn Sami Kamel fór á kostum.

Kamel skoraði frábært mark beint úr aukaspyrnu í fyrri hálfleik og bætti svo öðru marki við í seinni hálfleik með laglegri spyrnu.

Keflvíkingar voru svo rændir þriðja markinu. Dagur Ingi Valsson slapp í gegn eftir frábæra sendingu Kamel og skoraði en ranglega var flögguð rangstaða. Dagur fékk gult spjald fyrir að klára færið.

Blikar voru slakir í þessum leik í kvöld og óánægja Halldórs Árnasonar þjálfara liðsins sást vel þegar hann gerði fjórfalda skiptingu í hálfleik.

Kristófer Ingi Kristinsson var einn af þeim sem kom inn í hálfleik en hann minnkaði muninn í 2-1 á 75. mínútu. Kristinn Steindórsson komst nálægt því að jafna fimm mínútum síðar þegar hann skaut í þverslána.

Þrátt fyrir nokkuð þunga pressu undir lokin fann Breiðablik ekki jöfnunarmarkið og 2-1 sigur Keflavíkur urðu lokatölurnar. Gríðarleg vonbrigði fyrir Kópavogsliðið.