Spá þjálfara og fyrirliða fyrir Lengjudeildina: 8. sæti

Spáin:
1. ?
2. ?
3. ?
4. ?
5. ?
6. ?
7. ?
8. Þróttur R., 87 stig
9. Grótta, 83 stig
10. Njarðvík, 68 stig
11. ÍR, 66 stig
12. Dalvík/Reynir, 23 stig

8. Þróttur R.
Þróttarar sneru aftur í Lengjudeildina í fyrra eftir að hafa stoppað í eitt ár í 2. deild árið áður. Það er ekki hægt að segja að síðustu ár hafi verið frábær fyrir karlalið Þróttar en það er spurning hvort leiðin liggi upp á við núna, frekar en niður á við. Þróttarar hafa gengið í gegnum breytingar í vetur og hafa litið nokkuð vel út á undirbúningstímabilinu. Það verður spennandi að sjá liðið mæta til leiks í sumar og þeir eru líklegir til að koma á óvart, vera dökki hesturinn (e. dark horse) í þessari deild. Ef vel gengur, þá verður stemningin mikil á flottu svæði Þróttar í Laugardalnum, það er alveg ljóst.

Þjálfarinn: Sigurvin Ólafsson tók við Þrótti af Ian Jeffs í vetur. Hann skrifaði undir þriggja ára samning í Laugardalnum. Sigurvin þjálfaði KV frá 2018-2021 og kom liðinu úr 3. deild upp í Lengjudeildina. Hann var síðan aðstoðarþjálfari hjá KR og síðast aðstoðarþjálfari FH áður en hann tók við Þrótti í október síðastliðnum. „Þetta er stærra félag en staðan í deildinni síðustu árin hefur verið. Þeir eru að vinna þetta hægt og bítandi upp, en ég er mjög spenntur að taka þátt í þeirri uppbyggingu. Þetta er stórt hverfi og það er saga þarna," sagði Sigurvin þegar hann tók við Þrótti en það verður afar áhugavert að fylgjast með þessum spennandi þjálfari í þessu nýja giggi.

Baldvin Már Borgarsson, þjálfari Árbæjar, er sérfræðingur Fótbolta.net fyrir Lengjudeildina. Hann fer yfir liðin; þeirra styrkleika, veikleika og fleira. Í fyrra var hann aðstoðarþjálfari Ægis í Lengjudeildinni og þekkir hann því hana býsna vel.
Baldvin Már Borgarsson.

Styrkleikar:Flottur hópur sem er búið að styrkja og byggja ofan á frá því í fyrra. Venni finnst mér virkilega flottur og klókur þjálfari. Þróttur hefur spilað flottan varnarleik í vetur og bætt svo ofan á sóknargrunninn. Liðsheildin og stemningin er mikill styrkleiki Þróttara.

Veikleikar: Mér finnst Þróttara vanta þessa 'Viktor Jóns' týpu til þess að ýta liðinu upp á næsta level. Þeir eru samt með marga leikmenn sem geta skorað nokkur mörk, en enginn öskrar á mig að geta skorað 15 mörk eða meira.

Lykilmenn:
Eiríkur Blöndal - Hægri bakvörður sem ég hef lengi verið rosalega hrifinn af, virðist fá stærra leiðtogahlutverk sem fyrirliði meðan Baldur Hannes jafnar sig af leiðinlegum meiðslum. Eiki er eins og rennilás upp og niður hægra megin, mjög flottur sóknarlega og virkilega góður varnarlega.

Jörgen Pettersen - Duglegur og klókur miðjumaður sem kemur með mörk og stoðsendingar að borðinu ásamt því að klára sínar varnarskyldur vel.

Kostiantyn Iaroshenko - Virkilega öflugur leikmaður með mikinn sköpunarkraft, getur spilað allar stöðurnar í kringum framherjann og er alltaf hættulegur; mjög skemmtilegur spilari.

Fylgist með: Hlynur Þórhallsson, 19 ára öflugur og spennandi hafsent sem hefur fengið stórt hlutverk og verður í stóru hlutverki í sumar.

Komnir:
Björgvin Stefánsson frá Þrótti V.
Cristofer Rolin frá Ægi
Þórir Guðjónsson frá Fram
Samúel Már Kristinsson frá Kríu
Viktor Andri Hafþórsson frá Keflavík
Ísak Daði Ívarsson á láni frá Víkingi
Sigurður Steinar Björnsson á láni frá Víkingi
Dagur Traustason á láni frá FH
Þórhallur Ísak Guðmundsson frá Þrótti Vogum
Andi Morina frá KV (var á láni)
Vilhjálmur Kaldal Sigurðsson frá KV

Farnir:
Hinrik Harðarson í ÍA
Kostyantyn Pikul í Þrótt Vogum
Sam Hewson í KFK
Óskar Sigþórsson í KFK
Ágúst Karel Magnússon í Ægi á láni
Steven Lennon (var á láni frá FH)
Sergio Francisco Oulu til Kormáks/Hvatar
Eiður Jack Erlingsson í Þrótt V. á láni
Theodór Unnar Ragnarsson til Kormáks/Hvatar á láni



Dómur Badda fyrir gluggann: 8
Þróttarar hafa fengið spennandi og góðar viðbætur við hópinn, þar ber að nefna Ísak Daða og Steinar á láni frá Víkingum, Rolin úr Ægi og Viktor Andra frá Keflavík.

Fyrstu þrír leikir Þróttar:
3. maí, Þróttur R. - Þór (AVIS völlurinn)
10. maí, ÍBV - Þróttur R. (Hásteinsvöllur)
18. maí, Þróttur R. - Njarðvík (AVIS völlurinn)

Í besta og versta falli að mati Badda: Í besta falli enda þeir í fimmta sæti og í versta falli enda þeir í tíunda sæti.