Keflavík sótti stig í Kaplakrika í kvöld og er nú fjórum stigum frá fallsæti þegar fjórar umferðir eru eftir. Eysteinn Húni Hauksson, þjálfari Keflavíkur, þurfti að láta marga leikmenn spila út úr stöðu þar sem lykilmenn í vörnina vantaði.
Lestu um leikinn: FH 0 - 0 Keflavík
„Þetta er mjög mikilvægt stig. Það er ekki mikið að kvarta yfir frammistöðunu. Við lögðumst til baka þegar líða fór á leikinn sem er eðlilegt. Það var mikil samstaða í liðinu," segir Eysteinn.
Keflavík tapaði fyrir FH 0-5 á laugardaginn.
„Við einsettum okkur að skilja þann leik eftir, fyrir utan að við ætluðum að læra af honum. Það var áberandi meiri neisti í mönnum núna og þeir að hjálpa hvor öðrum."
Nacho Heras tók út leikbann í kvöld en hann verður einnig í banni í mikilvægum leik gegn HK á sunnudaginn. Hann fékk tveggja leikja bann eftir rauða spjaldið gegn FH. Hvað fannst Eysteini um að hann hafi fengið tvo leiki í bann?
„Það kom mér á óvart. Eina sem ég hef heyrt er að það hafi eitthvað með höfuðið að gera. Fyrir stuttu sáum við olnbogaskot í maga og það var einn leikur í bann. Þeir sem sjá um þessi mál hljóta að vera að gera þetta af reynslu en þetta kom mér á óvart."
Athugasemdir
