Manchester United er búið að jafna Englandsmeistara Liverpool á stigum á toppi úrvalsdeildarinnar eftir flottan sigur á sterku liði Aston Villa.

Fyrri hálfleikurinn var fjörugur þar sem bæði lið fengu góð færi án þess að skora þar til Anthony Martial gerði frábærlega að koma sér framfyrir varnarmenn Villa og skalla fyrirgjöf frá Aaron Wan-Bissaka í netið.

Rauðu djöflarnir fóru inn í leikhlé með verðskuldaða forystu en gestirnir úr Birmingham mættu grimmir inn í síðari hálfleikinn. Þeir komust nálægt því að skora áður en Bertrand Traore gerði loks jöfnunarmarkið eftir góða sendingu frá Jack Grealish.

Það leið þó aðeins um mínúta þar til Man Utd var komið í sókn og fékk umdeilda vítaspyrnu, sem Bruno Fernandes skoraði úr.

Leikurinn var áfram galopinn og fjörugur þar sem bæði lið komust hársbreidd frá því að gera fjórða markið mikilvæga sem annað hvort jafnar leikinn eða drepur hann. Marcus Rashford átti skot í stöng og var Jack Grealish afar líflegur en boltinn rataði ekki í netið þrátt fyrir góðar tilraunir gestanna undir lokin.

Niðurstaðan 2-1 sigur Man Utd í afar fjörugum leik. Man Utd deilir toppsætinu með Liverpool með 33 stig eftir 16 umferðir.

Villa situr áfram í 5-10. sæti þar sem öll lið eru með 26 stig.