ÍBV og Leiknir R. eru komin á blað í Bestu deild karla eftir 1-1 jafntefli á Hásteinsvelli fyrr í dag.
Lestu um leikinn: ÍBV 1 - 1 Leiknir R.
„Ég er ánægður með frammistöðuna og framlagið, þetta var mjög gott í dag. Þetta snýst um að fá þrjú stig þannig maður er hundfúll með að hafa ekki tekið stigin þrjú. Við vorum töluvert sterkari aðilinn í fyrri hálfleik, við hefðum þurft að nýta okkur það betur," sagði Hermann Hreiðarsson þjálfari ÍBV í samtali við Fótbolta.net eftir leikinn.
Hermann segir það vissulega vonbrigði að vera með eitt stig eftir fyrstu þrjár umferðirnar. Frammistaðan hafi þó verið góð í dag.
„Maður verður að horfa í frammistöðuna og í dag var hún góð, menn lögðu allt í þetta en í dag var þetta stöngin út“.
ÍBV heimsækir stigalausa Keflvíkinga í 4. umferð Bestu deildarinnar. Hermann var spurður út í hvernig honum litist á næsta verkefni.
„Vel, þetta var mjög „solid“ leikur hjá okkur þannig við getum byggt ofan á það og ég hlakka til.“