U21 landsliðsmaðurinn Kolbeinn Þórðarson kom inn á sem varamaður í seinni hálfleik er Lommel tapaði fyrir Westerlo í belgísku B-deildinni í kvöld.
Miðjumaðurinn byrjaði á bekknum en kom inn af bekknum á 72. mínútu. Hann fékk gult spjald áður en flautað var til leiksloka.
Lokatölur voru 2-0 fyrir Westerlo, sem er á toppnum með 17 stig. Lommel er í þriðja sæti með tíu stig.
Svava ónotaður varamaður gegn Lyon
Framherjinn Svava Rós Guðmundsdóttir var ónotaður varamaður hjá Bordeaux gegn stórliðinu Lyon í frönsku úrvalsdeildinni í kvöld.
Svava hefur komið við sögu í einum leik af fimm í deildinni á tímabilinu, og þurfti að gera sér það að góðu að vera allan tímann á bekknum í kvöld. Lyon vann leikinn örugglega, 1-4, eftir að hafa lent undir snemma leiks.
Landsliðsfyrirliðinn Sara Björk Gunnarsdóttir er á mála hjá Lyon, en hún er ekki að spila núna þar sem hún er ólétt. Lyon er á toppnum með fullt hús stiga eftir fimm leiki.
Athugasemdir