Það var tveimur æfingalandsleikjum að ljúka þar sem Neymar gerði eina markið í 0-1 sigri Brasilíu gegn Japan í Tókýó.
Brasilía var betri aðilinn í fjörugum leik en þeim tókst ekki að setja boltann í netið fyrr en á 77. mínútu. Neymar skoraði þá af vítapunktinum eftir að brotið hafði verið á Richarlison.
Lucas Paqueta átti skot í stöng og komust Neymar og Raphinha báðir nálægt því að skora í leiknum.
Brasilía er að undirbúa sig fyrir HM og mætti til leiks með gríðarlega sterkt lið eftir að hafa unnið stórsigur á Suður-Kóreu fyrir helgi.
Suður-Kórea mætti Síle í dag og tók forystuna í fyrri hálfleik með glæsilegu marki eftir laglegt einstaklingsframtak Hwang Hee-chan.
Varnarmaðurinn Alex Ibacache fékk sitt annað gula spjald í upphafi síðari hálfleiks og tókst tíu leikmönnum Síle ekki að gera jöfnunarmark.
Son Heung-min gerði út um viðureignina með marki í uppbótartíma og lokatölur urðu 2-0.
Japan 0 - 1 Neymar
0-1 Neymar ('77)
Suður-Kórea 2 - 0 Síle
1-0 Hwang Hee-chan ('12)
2-0 Son Heung-min ('91)
Rautt spjald: Alex Ibacache, Síle ('52)
