Lið FH er komið aftur á sigurbraut eftir tvo tapleiki í röð en liðið lagði Grindavík í hádegisleik í Kaplakrika í dag. Með sigrinum kemur FH sér í 19 stig og er því 6 stigum á eftir toppliði Vals eftir 12 umferðir.
Lestu um leikinn: FH 2 - 1 Grindavík
„Við erum ánægðir með þessi stig en þetta var skrýtinn leikur komst aldrei flot á hann eða tempó í spil. Fyrri hálfleikur hægur og við vorum aðeins of hægir á boltann en áttum engu að síður ágætis atlögur," sagði Ólafur Kristjánsson um leikinn í dag.
Pétur Viðarsson fékk að líta beint rautt spjald í upphafi fyrri hálfleiks en áður hafði Brynjar Ásgeir Guðmundsson fengið beint rautt hjá Grindavík. Hvernig horfði rauða spjaldið á Pétur við Ólafi?
„Ég hugsa að við hefðum viljað það sama ef þetta hefði verið okkar maður, Klaufalegt hjá Pétri og varnarmönnunum að bjóða upp á þessa stöðu og ég hef svo sem séð ákvarðanir dómara á undanförnum vikum sem ég hef verið meira ósammála."
Eddi Gomes sem talið var að hefði leikið sinn síðasta leik með FH liðinu og snúið aftur til síns liðs var mættur aftur á bekkinn hjá FH og kom inná í seinni hálfleik.
„Hann kom hérna núna og verður á láni hjá okkur út tímabilið. Aðstæður voru þannig í Kína að liðið sem hann er samningsbundinn vildu frekar nýta þetta útlendingaslot sitt í framherja og þá kom upp sá möguleiki að hann kæmi aftur hingað og við tökum fegins hendi á móti honum."
Sagði Ólafur Kristjánsson en nánar er rætt við hann í spilaranum hér að ofan
Eddi Gomes.
Athugasemdir
