Sky Sports greinir frá því að FC Bayern ætli sér að festa kaup á Sadio Mane frá Liverpool í sumar.
Hinn þrítugi Mane á aðeins eitt ár eftir af samningi sínum við Liverpool og hafa viðræður við félagið gengið brösulega.
Mane er af mörgum álitinn einn af bestu framherjum heims og var til að mynda valinn besti leikmaður Afríkumótsins í vetur.
Hann er búinn að skora 21 mark í 47 leikjum á tímabilinu og fundaði Hasan Salihamidzic, yfirmaður íþróttamála hjá Bayern, með umboðsmanni Mane í síðustu viku.
Félögin hafa ekki átt í opinberum viðræðum um félagaskipti Mane og neitaði Salihamidzic að tjá sig um Mane þegar hann var spurður yfir helgina.
Athugasemdir
