Klukkan 12:30 hófst Lundúnaslagur þegar Arsenal kom í heimsókn á Selhurst Park og mætti þar Crystal Palace.

Arsenal komst yfir eftir laglega sókn eftir tólf mínútna leik. Arsenal liðið lét boltann ganga vel og endaði sókn liðsins á sendingu Alexandre Lacazette inn á Pierre-Emerick Aubameyang sem skoraði með góðu skoti.

Staðan var 0-1 í hálfleik en á 54. mínútu jafnaði Jordan Ayew leikinn. Mikill heppnisstimpill var á þessu marki en Ayew skaut í David Luiz og þaðan fór boltinn í netið.

Á 67. mínútu átti sér stað atvik sem verður umrætt. Aubameyang braut þá illa á Max Meyer og lyfti dómari leiksins gulu spjaldi. Eftir aðstoð frá VAR breytti Paul Tierney, dómari leiksins, dómi sínum og gaf Aubameyang rautt spjald.

Mörkin urðu ekki fleiri í leiknum og því 1-1 jaftnefli niðurstaða. Þriðja 1-1 jafntefli Palace í röð og Mikel Arteta, stjóri Arsenal, byrjar á fimm stigum úr fyrstu fjórum leikjum sínum sem stjóri Arsenal.