Hinn 22 ára gamli Mykhailo Mudryk mun ganga í raðir Chelsea á næstu dögum en hann er sagður eftirlíking af einum besta leikmanni heims, Kylian Mbappe.
Chelsea náði samkomulagi við Shakhtar um kaup á Mudryk í gær en hann kostar félagið um 90 milljónir punda.
Mudryk flaug með eigendum Chelsea til Lundúna í gær og mun gangast undir læknisskoðun í dag áður en hann krotar undir sjö ára samning.
Úkraínumaðurinn hefur verið besti maður Shakhtar á tímabilinu en Arsenal reyndi einnig að fá hann og í raun mætti Chelsea á elleftu stundu og stal honum frá nágrönnum sínum.
Mircea Lucescu, fyrrum þjálfari Shakhtar, líkir Mudryk við Mbappe og segir að hann eigi eftir að gera frábæra hluti í ensku úrvalsdeildinni.
„Mudryk er eftirlíking af Mbappe. Það verður frábært að sjá hann spila á hærra stigi en hann er að gera núna. Það er ekki hægt að efast um gæði og sjónarmið hans,“ sagði Lucescu við rúmenska fréttamanninn Emmanuel Rosu.
Athugasemdir