KV vann C-deild Fótbolta.net mótsins með fimm mörkum gegn tveimur í kvöld.

Leikurinn var gríðarlega fjörugur en vendipunkturinn kom eftir um það bil hálftíma leik, þegar Snæþór Haukur Sveinbjörnsson markvörður Vængja Júpíters var rekinn af velli með beint rautt spjald.

Snæþór fékk snjóbolta í andlitið frá andstæðingi og brást illa við, sem varð til þess að dómarinn rak hann útaf.

Vængirnir, sem leika undir stjórn Tryggva Guðmundssonar, voru ekki með varamarkvörð á bekknum svo Marinó Þór Jakobsson þurfti að skella sér í markið.

Einar Már Þórisson var besti maður vallarins í dag og skoraði þrennu fyrir KV.