City Group gekk nýverið frá kaupum á brasilíska félaginu EC Bahia og hefur félagið þegar fengið leikmann lánaðan frá systurfélagi sínu á Englandi, Manchester City.
Sá leikmaður er brasilískur táningur sem svarar nafninu Kayky og þykir gríðarlega mikið efni. Hann var frábær með varaliði Man City í ensku varaliðadeildinni og var lánaður í portúgalska boltann í ágúst.
Kayky gekk ekki vel hjá Pacos de Ferreira í Portúgal og mun þess í stað reyna fyrir sér í heimalandinu eftir áramót. Þar mun hann fá meiri spiltíma heldur en í Portúgal.
Kayky er 19 ára gamall og hefur þjálfarateymi City gríðarlega miklar mætur á honum. Hann var leikmaður Fluminense áður en City keypti hann fyrir um 10 milljónir punda.
Athugasemdir
