Richarlison, leikmaður Tottenham Hotspur, mun að öllum líkindum missa af næstu leikjum liðsins vegna meiðsla sem hann varð fyrir á HM í Katar.
Brasilíski sóknarmaðurinn skoraði þrjú mörk með Brasilíu í Katar en hann átti eitt af flottustu mörkum mótsins er hann skoraði með laglegri bakfallsspyrnu í 2-0 sigri á Serbíu í riðlakeppninni.
Í leiknum gegn Króatíu í 8-liða úrslitum mótsins meiddist hann hann aftan í læri en hann er mættur aftur til Lundúna og mun fara í myndatöku í dag.
„Hann fer í dag í myndatöku til að vita alvarleika meiðslanna. Við munum komast að því eftir myndatökuna hvað hann þarf mikinn tíma til að jafna sig,“ sagði Antonio Conte á heimasíðu Tottenham.
Tottenham spilar við Brentford í ensku úrvalsdeildinni á annan í jólum en það þykir ólíklegt að hann verði með í þeim leik.
Athugasemdir