Lestu um leikinn: Þróttur R. 2 -  2 Fram

Guthrie, sem er 34 ára, byrjaði inn á miðsvæðinu. Um er að ræða mjög reyndan miðjumann sem hefur leikið yfir 100 leiki í ensku úrvalsdeildinni og um 150 leiki í Championship-deildinni. Hann hóf atvinnumannaferil sinn með Liverpool en er sennilega þekktastur fyrir tíma sinn hjá Newcastle og Reading.

Guthrie var leystur undan samningi við Blackburn Rovers 2017 og gekk árið eftir í raðir Mitra Kukar í Indónesíu. 2019-2021 lék fyrir Walsall í ensku D-deildinni. Hann lenti svo á Íslandi, óvænt, fyrir þetta tímabil.

„Við erum vonsviknir að fá á okkur mark svona seint eftir að hafa klikkað á mörgum færum," sagði Guthrie eftir leik.

„Þetta eru vonbrigði en samt erum við sáttir með margt í okkar leik. Við þurftum bara að nýta færin betur."

Elskar Ísland
Guthrie var spurður að því hvernig félagskiptin til Fram hefðu orðið að veruleika.

„Ég hætti að spila á Englandi í sex mánuði og velti því fyrir mér hvort ég myndi spila aftur. Ég var farinn að plana að byrja í þjálfun. Svo kom þetta tækifæri upp. Ég átti mjög góðar samræður við fólk hjá félaginu og hugsaði: 'Af hverju ekki?'. Mér fannst ég eiga meira eftir. Ég er stoltur að vera hluti af þessu liði."

„Ég hef einbeitt mér að því að spila. Ég hef reynt að hjálpa eins mikið og ég get; í búningsklefanum og á æfingum. Ég hef lent í smá veseni, bæði með Covid og meiðsli en núna er ég kominn aftur til að hjálpa liðinu að enda tímabilið taplaust."

Hann fékk auðvitað spurninguna: 'How do you like Iceland?'

„Ég elska það, algjörlega. Fjölskylda mín kom hingað og maki minn. Það er frábært fólk hérna og ég hef notið þess að vera hér," sagði sá enski en allt viðtalið má sjá hér að ofan. Hann var meðal annars spurður að því hvort hann sæi fram á að vera áfram á Íslandi næsta sumar.