Hvernig virkar umspilið?
Tólf lið taka þátt, þar á meðal þau tíu landslið sem höfnuðu í öðru sæti í sínum riðli í undankeppninni. Hin tvö sætin fara til þeirra tveggja landsliða sem stóðu sig best í Þjóðadeildinni en höfnuðu ekki í öðru af tveimur efstu sætunum í sínum riðli í undankeppninni.

Liðunum verður skipt upp í þrjár leiðir sem innihalda fjögur lið hver. Leiknir verða stakir undanúrslitaleikir og svo þrír stakir úrslitaleikir. Þau þrjú lið sem standa uppi sem sigurvegarar verða á HM í Katar á næsta ári.

Hvenær er drátturinn
Eins og áður segir: Í dag, föstudaginn 26. nóvember, klukkan 16:00 í Zurich.

Hvenær verður umspilið?
Undanúrslitaleikirnir verða 24. og 25. mars á komandi ári. Úrslitaleikirnir 28. og 29. mars.

Hvaða lið geta mæst?
Liðunum tólf er skipt upp í efri og neðri styrkleikaflokka. Hver leið er með tvö lið úr efri styrkleikaflokknum en þau geta ekki mæst í undanúrslitum. Liðin í efri styrkleikaflokknum leika til undanúrslita á heimavelli. Sérstaklega verður dregið um hverjir eiga möguleika á heimaleik í úrslitunum.

Efri styrkleikaflokkur: Ítalía, Portúgal, Skotland, Rússland, Svíþjóð, Wales.

Neðri styrkleikaflokkur: Tyrkland, Pólland, Norður-Makedónía, Úkraína, Austurríki, Tékkland.

Hvaða Evrópuþjóðir hafa þegar tryggt sér sæti á HM í Katar?
Liðin sem unnu sinn riðil í undankeppninni. Serbía, Spánn, Sviss, Frakkland, Belgía, Danmörk, Holland, Króatía, England og Þýskaland.