Það voru íslenskir leikmenn í eldlínunni í Evrópu í dag þó það sé landsleikjagluggi.
Emil Hallfreðsson var ekki í landsliðinu að þessu sinni og hann spilaði á Ítalíu með liði sínu Padova í C-deildinni þar.
Padova hefur verið að eiga gott tímabil og tókst liðinu að leggja Ravenna að velli í dag, 3-0. Emil spilaði allan leikinn og gerði gott betur en það, hann skoraði nefnilega fyrsta mark leiksins á 28. mínútu.
Padova er á toppnum í sínum riðli í C-deildinni með fimm stiga forskot eftir 33 leiki.
Þá spilaði sóknarmaðurinn Elías Már Ómarsson um hálftíma þegar lið hans, Excelsior, tapaði fyrir Helmond á heimavelli í hollensku B-deildinni, 3-0.
Excelsior er í tíunda sæti en Elías er næst markahæstur í deildinni með 18 mörk.
Athugasemdir