Bjarni skoraði sitt fyrsta mark í deildarkeppni fyrir uppeldisfélag sitt, KA.
„Það var mjög góð tilfinning að skora loksins fyrir uppeldisklúbbinn, það var bara gott. Ég hefði getað sett fleiri, en ég lét eitt duga í dag,'' sagði kampakátur Bjarni Aðalsteinsson, leikmaður KA, eftir 3-0 sigur gegn ÍA í Pepsi Max-deild karla.
Lestu um leikinn: KA 3 - 0 ÍA
Bjarni átti glimrandi góðan leik þar sem að hann skoraði og lagði upp. Miðjumaðurinn öflugi er frábær spyrnumaður, en mark hans kom þó með hnitmiðuðum skalla.
„Já, það er eitthvað nýtt! Ég hef lært þetta af Ella og Geira,'' sagði Bjarni og fékk orð í eyra frá samherja sínum, Elfari Árna Aðalsteinssyni.
„Við vissum náttúrulega að ÍA eru að berjast fyrir lífi sínu í deildinni og komum mjög peppaðir í leikinn og tilbúnir að berjast. Við sýndum bara hvað við vorum góðir hérna í dag og gáfum þeim aldrei séns.''
Bjarni er kokhraustur fyrir lokakaflann, en þar á KA góðan möguleika á að enda í Evrópusæti.
„Mér líst bara mjög vel á framhaldið. Við eigum þrjá leiki eftir og tel okkur eiga mjög góða möguleika á að taka níu stig úr því,'' sagði Bjarni Aðalsteinsson.
Viðtalið má sjá í heild sinni í spilaranum hér að ofan.
Athugasemdir
