Fulham og Everton gerðu markalaust jafntefli í 14. umferð ensku úrvalsdeildarinnar í dag en spilað var á Craven Cottage, heimavelli Fulham.

Gestirnir fengu fyrsta færið eftir nokkrar mínútur er Bernd Leno varði skot Demerai Gray. Vitalyi Mykolenko átti fínustu fyrirgjöf á Gray en Leno var vel vakandi í búrinu og varði skotið.

Willian kom sér þá í ágætis stöðu hinum megin á vellinum en Jordan Pickford varði skot hans yir markið.

Dominic Calvert-Lewin nagaði sig eflaust í handabökin eftir að Gray kom með laglega fyrirgjöf inn í teiginn en Calvert-Lewin tókst ekki að stýra boltanum á markið.

Fulham setti pressu á Everton í þeim síðari í leit að sigurmarkinu en það kom ekki. Aleksandar Mitrovic átti tíu skot í leiknum og líklega fúll yfir því að hafa ekki nýtt að minnsta kosti eitt þeirra.

Everton tekur þessu stigi. Liðið er í 12. sæti með 14 stig en Fulham í 7. sæti með 19 stig.