Pétur Pétursson, þjálfari Vals.
„Mér fannst við ekki góðar í fyrri hálfleik eftir korter og það truflaði mig. Mér fannst seinni hálfleikur vera fínn hjá okkur og við fengum færi til að klára leikinn líka eins og Blikarnir en þeir nýttu sín færi,“ sagði Pétur Pétursson, þjálfari Vals, í samtali við Fótbolta.net eftir stórleikinn gegn Breiðablik í kvöld. Eftir jafnan og spennandi fótboltaleik urðu það hlutskipti gestanna í Breiðablik að taka stigin þrjú og titilvonir Valskvenna því orðnar ansi veikar.
Lestu um leikinn: Valur 0 - 1 Breiðablik
„Þetta var svolítið taktískur leikur að mörgu leyti. En eins og ég segi þá var ég ekki sáttur við fyrri hálfleikinn og mér fannst við tapa leiknum þar. Við fengum þó mjög góð færi síðustu 10 mínútur í fyrri hálfleik. En svona er þetta stundum. Stundum skorarðu og stundum ekki,“ sagði Pétur um leikinn.
Það hefur verið gaman að fylgjast með endurkomu Mistar Edvardsdóttur á knattspyrnuvöllinn og hún kemur með nýjar víddir inn í leik Vals. Mist var áberandi í leiknum, þá sérstaklega fyrri hluta hans. Við spurðum Pétur út í endurkomu Mistar í Valsliðið.
„Eigum við ekki að orða það þannig að hún gerir ansi mikið fyrir okkur en ég sá náttúrulega líka að hún var orðin pínu þreytt. Það verður að segjast eins og er en hún stóð sig samt vel.“
Tapið í kvöld þýðir að Breiðablik kemst tveimur stigum upp fyrir Val og á auk þess leik til góða. Miðað við sérflokkinn sem Blikar og Valur hafa verið í í sumar verður að teljast nánast ómögulegt að Blikar fari að tapa stigum núna.
„Við hugsum bara um að spila þessa tvo leiki fyrir okkur og reyna að vinna þá en ég á ekki von á því að Blikarnir fari að tapa héðan af,“ sagði Pétur sem reiknar ekki með að eiga í vandræðum með að gíra sitt lið upp í leikina tvo.
„Það get ég ekki ímyndað mér, eru ekki allir samningsbundnir? Þarf ekki að klára samningana sína?“ sagði Pétur að lokum en hægt er að horfa á allt viðtalið við hann í spilaranum hér að ofan.
Athugasemdir
