„Mér líst mjög vel á sumarið og ég er hrikalega spennt. Ég held að við séum búnar að bæta okkur frá því síðasta sumar og erum klárlega reynslunni ríkari. Hópurinn er bara svipaður en auðvitað missum við lykilleikmenn í barneignir og þær reyndust okkur ótrúlega vel. En það kemur maður í manns stað."

„Já, það er klárt að við ætlum okkur upp og ég held að allir viti að það sé stefnan. Það er markmið númer eitt, tvö og þrjú."

Sísí sagði að stefnan í fyrra hefði verið að fara upp um deild og því hafi niðurstaða tímabilsins verið vonbrigði. „Við vorum búnar að vera í fyrsta sæti hluta af sumrinu og auðvitað situr það í okkur en við erum tilbúnar í þetta sumar."

Hvernig er staðan á þér sjálfri?

„Staðan er mjög góð, mér líður hrikalega vel í FH og er full tilhlökkunar að spila með liðinu í sumar," sagði Sísí.

FH spilar sinn fyrsta leik í Lengjudeild kvenna þetta sumarið gegn Haukum í kvöld.