Mynd: EPA

Inter gerði 2-2 jafntefli gegn Monza í gær en Inter átti að komast í 3-1 forystu þegar dómari leiksins gerði risa stór mistök. Hann flautaði brot áður en Francesco Acerbi kom boltanum í netið og því gat VAR ekki dæmt markið löglegt.

Í ljós kom að það var ekkert brot til staðar heldur flæktust tveir leikmenn Monza saman. Þar sem dómarinn var búinn að flauta áður en boltinn fór í netið var ekkert hægt að gera.

Þrátt fyrir það hraunaði Lautaro yfir VAR eftir leik.

„Þetta skipti öllu máli, þetta breytti leiknum. Eins og þjálfarinn sagði við okkur í klefanum eftir leik, eftir fjögur til fimm ár af notkun á VAR og þeir ná enn ekki að dæma rétt, þá er eitthvað ekki í lagi,” sagði Lautaro.

„Ég persónulega er ekki stuðningsmaður VAR, ég var það ekki í byrjun og er það ekki enn. Þetta er nýtt í fótboltanum og við aðlöguðumst því. Það þarf að nota þetta rétt annars eyðileggur þetta allt. Ekki bara útaf leiknum í dag, þetta er bara ekki gott fyrir fótboltann yfir höfuð.”

Tvö töpuð stig hjá Inter gær sem er mjög svekkjandi í ljósi þess að liðið vann topplið Napoli í miðri viku.