| fös 03.maí 2024 11:15 Mynd: Fótbolti.net - Haukur Gunnarsson |
|
Spá þjálfara í 2. deild: 2. sæti
Fótbolti.net kynnir liðin sem leika í 2. deild í sumar eitt af öðru eftir því hvar þeim er spáð. Við fengum alla þjálfara liðanna í deildinni til að spá fyrir sumarið og fengu liðin því stig frá 1-11 eftir því en ekki var hægt að spá fyrir sínu eigin liði. Í öðru sæti er Selfoss og er því spáð að þeir fari beint aftur upp.
Selfoss fagnar marki á síðasta tímabili.
Bjarni Jóhannsson tók við Selfossi í vetur.
Gonzalo Zamorano.
Gary Martin fór í Víking Ólafsvík.
Þorlákur Breki Baxter kom aftur frá Stjörnunni.
Robert Blakala.
Úr leik Selfoss og Hauka á undirbúningstímabilinu, liðunum sem er spáð öðru og þriðja sæti.
1.
2. Selfoss, 97 stig
3. Haukar, 96 stig
4. Víkingur Ó. 94 stig
5. Þróttur V., 92 stig
6. Ægir, 78 stig
7. Höttur/Huginn, 56 stig
8. KFG, 54 stig
9. Völsungur, 37 stig
10. Reynir S., 35 stig
11. KF, 27 stig
12. Kormákur/Hvöt, 13 stig
2. Selfoss
Síðasta sumar var gríðarlega erfitt á Selfossi þar sem bæði karla- og kvennalið félagsins féllu niður um deild, karlaliðið í 2. deild og kvennaliðið í Lengjudeildina. Karlaliðið var að lokum ekki langt frá því að bjarga sér eftir erfitt sumar en það munaði bara einu marki í lokaumferðinni. Selfoss endaði með -12 í markatölu á meðan Njarðvík var með -11. Gat nánast ekki verið tæpara. En kannski er það bara gott fyrir Selfoss að taka þetta skref og byggja upp á nýtt. Árin á undan höfðu ekki verið neitt frábær heldur nefnilega. Í sumar munu ungir strákar vonandi fá tækifæri til að láta ljós sitt skína og reyna að koma Selfossi aftur upp í næst efstu deild.
Þjálfarinn: Reynsluboltinn Bjarni Jóhannsson tók við Selfossi í vetur. Hann gerði tveggja ára samning við félagið. Bjarni er einn af reynslumestu þjálfurum landsins, en hann hóf þjálfaraferilinn á heimaslóðunum með Þrótti Neskaupstað. Á sínum ferli hefur Bjarni þjálfað Tindastól, Grindavík, Breiðablik, ÍBV, Fylki, Stjörnuna, KA og Vestra ásamt því að hafa verið aðstoðarlandsliðsþjálfari Íslands en hann hefur lyft öllum helstu titlum sem hægt er að vinna hér á landi. Hann er líka með mikla reynslu í því að koma liðum upp um deild. Bjarni verður með fyrrum landsliðsframherjann Heiðar Helguson sér til aðstoðar.
Sjá einnig:
Bjarni Jó snýr aftur eftir lærdómsríka pásu
Stóra spurningin: Var gott fyrir Selfoss að falla?
Liðið mun treysta svolítið á uppalda leikmenn og vonandi munu margir ungir leikmenn fá tækifæri á Selfossi í sumar. Kannski þegar litið verður til baka, þá var það gott fyrir Selfoss að falla til þess að geta þróað unga leikmenn sína áfram. Selfossi er spáð öðru sæti en það munaði ótrúlega litlu á liðunum í öðru til fimmta sæti í þessari spá og má búast við gríðarlega harðri baráttu á toppnum.
Lykilmenn:
Gonzalo Zamorano Leon: Spænski sóknarmaðurinn er núna einn reynslumesti maðurinn í hópnum. Hann spilaði síðast í 2. deild með Hugin á Seyðisfirði árið 2017, en þá skoraði hann 16 mörk í 22 leikjum. Hann þarf að skora meira en hann gerði síðasta sumar en þá skoraði hann einungis þrjú mörk í Lengjudeildinni.
Adrian Sanchez: Fínasti varnarmaður sem er núna á leið inn í sitt annað tímabil með Selfossi. Spánverjinn var bara nokkuð fínn í Lengjudeildinni í fyrra og ætti að geta verið býsna góður í þessari deild.
Robert Blakala: Þessir þrír útlendingar eiga að bera liðið svolítið uppi. Blakala er virkilega góður markvörður sem myndi eflaust gera góða hluti í Lengjudeildinni. Bjarni Jó þekkir Blakala vel og var fljótur að sækja hann á Selfoss.
Komnir:
Alfredo Ivan Arguello Sanabria frá Árbæ
Jose Manuel Lopez Sanchez frá Spáni
Robert Blakala frá Njarðvík
Þorlákur Breki Þ. Baxter frá Stjörnunni (á láni)
Farnir:
Aron Einarsson frá Leikni R.
Gary Martin í Víkingi Ó. (á láni)
Guðmundur Tyrfingsson í Fylki
Hrannar Snær Magnússon í Aftureldingu
Oskar Wasilewski í Kára
Stefán Þór Ágústsson í Val
Þorsteinn Aron Antonsson í Val
Þór Llorens Þórðarson í Kára
Þjálfarinn segir - Bjarni Jóhannsson
„Tímabilið leggst vel í mig. Það eru nýjar áskoranir og nýtt lið. Við verðum með ungt og efnilegt lið í sumar. Það er sturluð staðreynd að tíu af 16 leikjahæstu mönnunum frá síðasta tímabili eru horfnir á braut. Við erum með 25 manna leikmannahóp og 21 leikmaður er uppalinn í yngri flokkum Selfoss. Þetta er áskorun fyrir þjálfarateymið og fyrir félagið sjálft. Við erum búnir að undirbúa okkur vel og við erum klárir."
„Það er búið að ganga ágætlega í vetur. Við byrjuðum að spila æfingaleiki seint en það var vegna þess að við vorum í ákveðnu uppbyggingarprógrammi. Leikur liðsins hefur farið vaxandi og við teljum okkur klára í mótið."
„Það kitlar alltaf egóið þegar aðrir þjálfarar í deildinni hafa trú á því að við getum farið upp en við skulum gera okkur grein fyrir því að þetta er grjóthörð deild. Ég er búin að sjá öll þessi lið spila og að mínu mati eru fimm eða sex lið sem klárlega gera tilkall í að fara upp. Við ætlum að vera með í þeirri baráttu. Þetta eru erfið ferðalög og langt mót. Þetta verður erfitt en auðvitað eru menn klárir í þetta."
Fyrstu þrír leikir Selfoss:
4. maí, Selfoss - Kormákur/Hvöt (JÁVERK-völlurinn)
11. maí, Völsungur - Selfoss (PCC völlurinn Húsavík)
18. maí, Selfoss - KFA (JÁVERK-völlurinn)
Athugasemdir
