FH vann 1-0 sigur á Víkingi á Kaplakrikavelli í 12.umferð Pepsí Max-deildar karla í kvöld. Arnar Gunnlaugsson þjálfari Víkings var ánægður með spilamennsku síns liðs og sagði að liðið hefði spilað virkilega vel þrátt fyrir tapið.
Lestu um leikinn: FH 1 - 0 Víkingur R.
„Ég er stoltur af strákunum, þetta var mjög flottur leikur hjá okkur og ef þú vilt tapa fótboltaleikjum þá vil ég tapa þeim svona. Við vorum bara virkilega góðir, fengum flott færi en náum því miður ekki að nýta þau, við vorum beittir, við vorum fit, mér fannst við geta klárað annan leik eftir þennan leik. Að tapa svona leik er ekki tilefni til að breyta einum einasta hlut, það var bara gæðamark sem skildi liðin að."
Kári Árnason spilaði sinn fyrsta leik fyrir Víking eftir að hafa verið í atvinnumennsku síðastliðin 15 ár og Arnar var mjög ánægður með innkomu hans í hópinn.
„Það er frábært að fá Kára inn, þetta er skemmtileg blanda. Það var reynslumikil vörn og svo leikskólinn þarna á miðjunni og frammi. Það er frábært fyrir þessa ungu stráka að læra af Kára á æfingum og í leik. Fólk sér Kára í landsliðinu þar sem hann er mikið að verjast en Kári er bara frábær fótboltamaður sem mun nýtast okkur vel."
Arnar á ekki von á að styrkja hópinn frekar og útilokar að fá Helga Guðjónsson leikmann Fram sem hefur verið ítrekað orðaður við Víking.
„Hópurinn er ekkert rosalega breiður en það eru gæði í honum, menn koma inn og passa strax inn í leikstíl liðsins. Helgi er bara í fínum málum hjá Fram og Fram í fínum málum með hann. Ég á ekki von á að styrkja hópinn frekar, ég er ánægður með hópinn."
Athugasemdir