Einum fjörugasta leik tímabilsins í ítölsku úrvalsdeildinni lauk nú rétt í þessu þegar Sassuolo og Fiorentina mættust.

Eftir nokkuð bragðdaufan fyrri hálfleik hófst fjörið fyrir alvöru eftir rúmlega klukktíma leik þegar Alfred Duncan kom Sassuolo yfir. Khouma Babacar tvöfaldaði forystu heimamanna stuttu síðar.

Giovanni Simeone, sonur Diego Simeone þjálfara Atletico Madrid minnkaði muninn á 70. mínútu.

Stefano Sensi kom Sassuolo í 3-1 á 80. mínútu og þá héldu væntanlega flestir að þrjú stig væru komin í hús, svo var ekki. Marco Bennasi minnkaði muninn á 89. mínútu. Sjö mínútum var bætt við venjulegan leiktíma.

Filip Djuricic leikmaður Sassuolo og Nikola Milenkovi leikmaður Fiorentina fengu báðir að líta sitt síðara gula spjald undir lok leiks og bæði lið enduðu því með tíu leikmenn á vellinum.

Það var ekki fyrr en á 96. mínútu sem að Kevin Mirallas náði að jafna fyrir Fiorentina þegar hann fékk stungusendingu í gegn frá Germán Pezzella. Lokatölur 3-3 í mögnuðum leik.