„Ég er mjög svekktur að tapa, ég hefði viljað að við hefðum tryggt sætið á okkar eigin forsendum, það var planið, við ætluðum að vinna þennan leik," sagði Sveinn Elías Jónsson annar þjálfara Þórs eftir 1-2 tap liðsins gegn Selfossi í dag.
Lestu um leikinn: Þór 1 - 2 Selfoss
„Við brutum markamúrinn sem var stærri en kínamúrinn að því er virðist vera, það virtist engu máli skipta hversu mörg og góð færi við vorum búnir að fá í síðustu leikjum en boltinn vildi ekki í netið."
Jóhann Helgi skoraði tvö mörk sem voru dæmd af honum. Sveini fannst dómgæslan góð heilt yfir í dag en honum fannst að bæði mörkin hefðu átt að standa.
„Mér fannst leikurinn heilt yfir vel dæmdur en ég var mjög svekktur með tvær ákvarðanir í mörkunum sem Jóhann skoraði, mér fannst þau bæði átt að standa."
„Dómarinn verður að skilja það að það verður að vera rómantík í þessu og ef sóknarmaðurinn á að njóta vafans og allt það. Þetta síðasta mark í lokin, þetta á bara að vera mark, ég hlakka til að sjá myndband af því og sjá að hann hafi virkilega verið svona rangstæður því að ég held að það hafi liðið svona 8 sekúndur þangað til hann lyfti flagginu því hann hafði held ég ekki hugmynd um hvað hann var að gera en það var niðurstaðan, svona er bara boltinn."
Sveinn segir að umfjöllunin um markaþurrð liðsins hafi farið illa í menn.
„Það sem að mér fannst augljóst í leik liðsins það var að öll umfjöllun og allt tal um þessa markaþurrð að hún er komin í hausinn á mönnum. Það er erfitt að gíra menn upp og mér fannst það sjást á liðinu að við værum með lítið sjálfstraust en á móti kemur að þá fannst mér við betri en Selfoss liðið. Við förum í pressulausan leik í síðustu umferð og við munum halda áfram að gefa ungum mönnum tækifæri. Ég vona að þeir spili skemmtilegan bolta og við sækjum þrjú stig."
Þór ætlaði að keyra á reynslunni í dag segir Sveinn.
„Við ætluðum að keyra á reynslunni, strákarnir voru stálheppnir að ég fékk aðeins í bakið í vikunni annars hefði ég verið líklegur til að setja sjálfan mig í byrjunarliðið en það slapp í dag."
Orri Freyr Hjaltalín hætti með Þór á dögunum, Sveinn Elías og Jón Stefán Jónsson klára tímabilið undir stjórn liðsins en Sveinn segir að þetta sé mjög spennandi starf fyrir næsta þjálfara.
„Framhaldið hjá Þór, ég hef engar áhyggjur af því, það eru að koma svo flottir drengir upp, mjög margir af þeim í raun búnir að fá eldskírnina sína í sumar, búnir að fá fullt af mínútum þannig að ég hef engar áhyggjur af því, þetta er mjög spennandi starf að taka við."
Athugasemdir
