Thomas Tuchel, stjóri Chelsea, viðurkennir að hann hafi mögulega hent spænska miðjumanninum Saul of snemma út í djúpu laugina í 3-0 sigrinum á Aston Villa í dag.
Saul kom til Chelsea á lokadegi gluggans á láni frá Atlético og var hent í byrjunarliðið fyrir leikinn í dag.
Hann átti afar erfitt uppdráttar og virtist í erfiðleikum með að finna samherja. Villa náði að búa til sér nokkur færi útaf mistökum hans og viðurkenni Tuchel að hann hafi mögulega gert mistök á að setja hann í byrjunarliðið.
„Mér fannst hann ströggla. Það voru nokkur stór mistök í sendingum og hann átti í erfiðleikum með styrkleikann. Það sást að hann er ekki alveg búinn að aðlagast," sagði Tuchel.
„Þetta er á mína ábyrgð. Ég hafði það á tilfinningunni að hann gæti stokkið inn í liðið og spilað á þessu stigi. Ég hélt svo að það væri kannski best að skipta honum af velli en það breytir ekki skoðun minni á honum."
„Þetta er mjög erfitt. Annaðhvort getur maður þetta eða ekki og ég sagði við hann að þetta væri á mína ábyrgð ef þetta myndi ekki ganga upp. Hann var í smá basli og bjó til nokkur hálffæri fyrir Aston Villa," sagði hann ennfremur.
Athugasemdir