ÍBV mun fá Gary Martin í sínar raðir þegar félagaskiptaglugginn opnar í júlí.
Gary samdi um starfslok við Val í lok maí og varð þannig laus allra mála. Gary hefur skorað 45 mörk í 96 leikjum í efstu deild og gerði hann tvö mörk í þremur deildarleikjum með Val áður en hann var látinn fara.
Gary er fæddur 1990 og hefur leikið fyrir Lilleström, Lokeren og York City undanfarin ár. Hér á landi hefur hann spilað fyrir ÍA og Víking R. auk Vals og KR.
ÍBV er á botni deildarinnar. Pedro Hipolito, þjálfari liðsins, var spurður að því í viðtali eftir 5-1 tap gegn Val í dag hvort framlag Gary myndi hjálpa ÍBV að forðast fall.
„Gary Martin kemur til að hjálpa, en allir aðrir leikmenn liðsins hjálpa líka. Það er ekki bara einn leikmaður í fótboltaliði. Við þurfum að bæta okkur. Þetta er sama lið og vann ÍBV. Þetta er bara einn leikur, það dó enginn út af þessum leik."
Athugasemdir