Fram gerði 2-2 jafntefli við Þrótt R á útivelli í kvöld eftir að hafa verið einu marki yfir í hálfleik. Jón Sveinsson þjálfari Fram var ekki alveg nógu sáttur með spilamennsku liðsins í seinni hálfleik en sættir sig þó við eitt stig úr leiknum.
Lestu um leikinn: Þróttur R. 2 - 2 Fram
„Mér fannst við hafa töluverða yfirburði í fyrri hálfleik. Kannski vantaði aðeins að setja mark númer tvö til að hafa leikinn betur í hendi. Þróttararnir virkilega lögðu sig fram og hlupu og börðust allan leikinn. Sérstaklega komu þeir grimmir í seinni hálfleik og við áttum bara aðeins í vök að verjast út á vellinum. Áttum kannski á endanum ekkert meira skilið en eitt stig úr þessu''.
„Niðurstaðan 2-2 og Þróttararnir eiga hrós skilið fyrir sinn leik í dag''
Fram lenti undir eftir að hafa leitt í hálfleik. Jöfnunarmarkið var svo sjálfsmark sem kemur í blálokin. Jón var ekki sáttur með spilamennskuna í seinni hálfleik.
„Ég er ekki sáttur við spilamennskuna í seinni hálfleik og ekki sáttur við að hafa ekki klárað kannski leikinn í fyrri hálfleik eða komið öðru marki á þá. Við vissum alveg að Þróttararnir eru að berjast fyrir lífi sínu og svoleiðis liðum er alltaf erfitt að mæta. Þeir lögðu allt í þetta og við vorum ekki alveg tilbúnir að mæta þeim''.
Framarar þurftu að gera tvær breytingar vegna meiðsla. Slíkt setur kannski lið aðeins úr jafnvægi en Jóni fannst það ekki hafa skipt sköpum í dag. „Auðvitað truflar það eitthvað aðeins en góðir menn koma bara inn á. Þú ert með marga leikmenn til að leysa þessar stöður, það er bara svoleiðis''.
Athugasemdir
