Víkingur R. tapaði 3-0 á heimavelli gegn FH í toppbaráttu Lengjudeildar kvenna í kvöld. John Andrews, þjálfari Víkings var að vonum ekki sáttur eftir leik.
„Það er erfitt að koma og skapa svona mörg færi og í rauninni var þetta frábær fótboltaleikur, leikir á milli FH og Víkings eru alltaf frábærir leikir, en það eru vonbrigði að við nýttum ekki nokkur af færunum okkar því mér fannst við eiga skilið að minnsta kosti nokkur mörk. Ef við hefðum skorað fyrst, þá hefði þetta kannski orðið annar leikur," sagði John Andrews í viðtali eftir leik.
Lestu um leikinn: Víkingur R. 0 - 3 FH
John gat ekki sett fingur á það hvað vantaði upp á fyrir framan markið í kvöld.
„Ég veit það ekki, kannski er það smávegis heppni eða eitthvað, því við spiluðum ákaflega vel og sköpuðum helvíti mörg færi, þannig kannski smá meiri löngun til að setja boltann í netið."
John var ekki viss við hverju megi búast í næsta leik gegn Grindavík.
„Þær eru frábærar og með frábæran þjálfara, mjög skipulagðar með góða leikmenn. Þetta er annað stórt próf fyrir okkur, eins og ég hef sagt allt tímabilið, Lengjudeildin er frábær deild þannig að allir leikir verða mjög, mjög erfiðir. En við elskum það, við elskum áskoranir. Þetta verður góður leikur á þriðjudaginn til að koma þessum leik út úr systeminu," sagði John Andrews að lokum.
Viðtalið í heild má sjá í spilaranum hér fyrir ofan.