Nik Chamberlain verður áfram þjálfari kvennaliðs Þróttar í Reykjavík en hann er búinn að skrifa undir nýjan fjögurra ára samning við félagið.
Nik er Englendingur sem spilaði hér á landi með hléum frá 2007. Hann spilaði með Álftanesi, ÍH, Hugin, Dalvík/Reyni, Fjarðabyggð, Aftureldingu og SR.
Hann hefur þjálfað hjá Þrótti frá 2016 með góðum árangri. Hann kom liðinu upp í Pepsi Max-deildina fyrir síðasta tímabil. Allir sérfræðingar spáðu liðinu falli, en annað kom á daginn. Þróttur endaði að lokum í fimmta sæti sem er besti árangur í sögu félagsins.
Nik er menntaður í íþróttafræðum frá Auburn háskólanum í Montgomery Alabama í Bandaríkjunum og hann er við það að ljúka UEFA-A þjálfaragráðu.
Nik hefur haldið utan um kvennafótboltann Í Þrótti undanfarin ár og er í fullu starfi sem þjálfari mfl. kvenna, 2. fl. og að auki yfirþjálfari yngri flokka stúlkna. Hann sinnir öllum þessum störfum áfram.
Kristján Kristjánsson, formaður knattspyrnudeildar Þróttar, segir: „Nik hefur verið sannkallaður hvalreki fyrir kvennaflokka Þróttar og náð mjög góðum árangri þau ár sem hann hefur verið hér. Við lögðum mikla áherslu á að halda honum áfram og það er góð jólagjöf fyrir félagið að innsigla fjögurra ára samning við hann.”
Athugasemdir