Stjarnan hefur aðeins skorað í einum af sex fótboltaleikjum sínum í sumar.

Brynjar Gauti Guðjónsson, varnarmaður Stjörnunnar, var í viðtali við Vísi eftir tapið gegn KA síðastliðið mánudagskvöld þar sem hann sagði: „Það er allskonar vitleysa búin að vera í gangi sem tengist fótbolta ekki neitt. En við höfum ekkert látið það trufla okkur inni á vellinum."

„Hann sagði bara þarna: 'Við erum lélegir'," sagði Tómas Þór Þórðarson og bætti Elvar Geir Magnússon við: „'Þetta er ekkert vesenið á bak við tjöldin, við erum bara svona lélegir'. Ég veit það ekki."

Þorvaldur Örlygsson tók við Stjörnunni eftir að Rúnar Páll Sigmundsson hætti eftir fyrstu umferð. Hann var titlaður sem aðalþjálfari með Rúnari.

„Hann er ekki í stöðu sem hann vildi vera í," sagði Elvar Geir og bætti Tómas við: „Svo skýtur hann á Stjörnuna í gegnum fjölmiðla eftir síðasta leik þegar hann segir að þeir höfðu allan veturinn til að finna framherja. Það var alveg morgunljóst á þessum ummælum og hvernig þetta hefur verið, að Þorvaldur var aðstoðarþjálfari Rúnars Páls, og væntanlega frábær sem slíkur."

Rætt var um það í þættinum að Þorvaldur var misskilinn karakter.

„Ég vorkenni honum að vera í þessari stöðu því hann vill augljóslega ekki vera í þessari stöðu og hann getur ekki sagt það sem honum liggur á hjarta," sagði Elvar.

„Hann er bara að taka einhverju búi sem hann vildi ekkert taka við," sagði Benedikt Bóas en Þorvaldur var að taka liðinu af herra Stjörnunni, Rúnari Páli.

Hægt er að hlusta á allan þáttinn hér að neðan en þar er rætt meira um Stjörnuna og það sem er í gangi þar.