Aron Elís Þrándarson er með íslenska landsliðshópnum sem æfir í Danmörku fyrir komandi átök í Þjóðadeildinni.
Aron Elís á tíu leiki að baki fyrir Ísland og leikur með OB í Óðinsvéum sem tapaði úrslitaleik danska bikarsins eftir vítaspyrnukeppni gegn Midtjylland á dögunum.
„Þetta gerist eiginlega ekki meira svekkjandi, við vorum bara vítakeppni frá því að vera í Evrópu. Þetta var svekkelsi dagana eftir og maður er nýkominn yfir þetta, það hjálpar til að vera kominn í frískt umhverfi," sagði Aron Elís sem er tilbúinn í landsliðsverkefnið.
„Líkamsástandið er að verða betra og betra, það er búið að vera smá bras á mér á þessu ári. Ég er búinn að vera inn og út úr liðinu og þegar við vorum í vandræðum þá spilaði ég meiddur. Ég spilaði kannski aðeins of mikið og það kom í bakið á mér en nú er ég kominn aftur af stað."
Aron Elís var að lokum spurður út í framtíðaráformin sín og finnst líklegt að hann muni framlengja við OB.