Enska úrvalsdeildarfélagið Chelsea er á eftir franska framherjanum Moussa Dembele. Sky Sports greinir frá í dag.
Dembele samdi við Lyon fyrir einu og hálfu ári síðan frá Celtic en hann hefur gert 25 mörk fyrir liðið á þeim tíma.
Michy Batshuayi og Olivier Giroud eru líklega á förum í janúar og þarf Chelsea því á framherja að halda.
Samkvæmt Sky Sports er Chelsea að skoða möguleikann á að fá Dembele en hann þekkir vel til á Englandi. Hann spilaði með Fulham frá 2013 til 2016.
Dembele er sagður með svipaðan leikstíl og Didier Drogba en sá gerði garðinn frægan hjá Chelsea. Drogba skoraði 164 mörk á tíma sínum hjá Chelsea og vann meðal annars ensku úrvalsdeildina fjórum sinnum og Meistaradeildina einu sinni.
Athugasemdir