Neymar var gagnrýndur harkalega fyrir leikaraskap sinn í 2-0 sigri Brasilíu gegn Mexíkó í 16-liða úrslitum heimsmeistaramótsins í dag.
Neymar var maður leiksins þar sem hann skoraði og lagði upp. Juan Carlos Osorio, landsliðsþjálfari Mexíkóa, var meðal þeirra fjölmörgu sem hraunuðu yfir brasilísku stórstjörnuna.
Neymar gefur lítið fyrir gagnrýnina og forðaðist að tala um eigin leikaraskap.
„Ég held að þetta sé tilraun til að gera lítið úr mér. Ég hlusta ekki mikið á gagnrýni, hvort sem hún er neikvæð eða jákvæð, því hún getur breytt hugsunarhætti leikmanna. Ég hef séð það gerast," sagði Neymar.
„Ég talaði ekki við fjölmiðla strax eftir leikinn því fólk var alltof æst. Ég veit ekki hvort aðrir séu hérna bara til að sýna sig, en ég er hér einungis til að vinna heimsmeistaramótið með liðsfélögum mínum."
Athugasemdir