Jón Sveinsson þjálfari Fram var virkilega svekktur eftir að liðið hans missti unnin leik niður í jafntefli á lokamínútunni gegn KA í kvöld.
Lestu um leikinn: Fram 2 - 2 KA
„Þetta eru bara svekkelsi, við áttum að vinna stærra en við fáum á okkur 2 mörk í restina og ég meina mörk breyta leikjum og þegar þeir skora 2-1 þá fengu þeir smá kraft til þess að klára leikinn. Við á hinn bóginn erum bara klaufar að koma ekki boltanum í betri færi, við vorum að taka góða hlaup og vorum með góðar stöður 4 á móti 4, 3 á móti 3 hátt upp á vellinum en náðum ekki að nýta okkur það og bara líður eins og við höfum tapað leiknum."
Fram var heilt yfir betra liðið í dag og þeir geta kannski nagað sig svolítið í handabakið að hafa ekki skorað jafnvel fleiri mörk í dag.
„Ég er ekkert að segja að við höfum vaðið í færum en við vorum að komast í mjög góðar stöður sérstaklega þarna í restina þegar þeir voru að reyna leggja allt í sölurnar til að jafna leikinn. Þá voru þeir mjög opnir og við vorum að fá góð hlaup frá Jannik til dæmis og Albert en því miður þá náðum við ekki að nýta okkur það og við tókum rangar ákvarðanir með boltan fannst mér og fengum það í andlitið þannig þetta var niðurstaðan."
Albert Hafsteinsson kemur inn á sem varamaður í hálfleik og skilar 2 stoðsendingum. Akkúrat það sem þjálfari vill fá frá varamönnunum sínum.
„Það var náttúrulega ástæðan fyrir því að við sendum hann inn á. Við vitum alveg hvað Albert gefur okkur, hann er að taka góð hlaup og bæði mörkin koma þannig að hann er að hlaupa bakvið vörnina og finnur Fred í bæði skiptin þannig það var virkilega vel gert hjá honum og það var ástæðan fyrir því að við gerðum þessa breytingu."
Nú eru 2 leikir eftir af deildinni þangað til hún skiptist. Fram situr í 7. sæti 3 stigum á eftir KR sem er í 6.sæti sem er einmitt síðasta plássið í efri hlutanum.
„Þess vegna er þetta þá kannski bara ennþá meira svekkjandi að við höfum ekki klárað þennan leik í dag. Þetta er bara barátta hver einasti leikur og næst er bara út í eyjar sem er alveg gríðarlega erfitt. ÍBV á góðri siglingu og hafa algjörlega verið að ná vopnum sínum þannig við þurfum að vera klárir í þann slag. Svo verðum við bara að sjá eftir þessa 2 leiki hver staðan er, stigafjöldi og annað hvar við stöndum. Þá tekur einhverskona úrslitakeppni við og tíminn leyðir það bara í ljós hvar við endum í þessu."
Viðtalið má sjá í heild sinni í spilaranum hér fyrir ofan.
