Atalanta tók á móti Cagliari í fyrsta leik dagsins í ítölsku Serie A deildinni og úr varð mikil markaveisla.

Heimamenn í Bergamó sóttu frá fyrstu til síðustu mínútu og fundu gestirnir frá Sardiníu engin svör.

Luis Muriel kom Atalanta yfir snemma leiks og jafnaði Diego Godin með skalla eftir hornspyrnu. Papu Gomez kom Atalanta aftur yfir áður en Mario Pasalic tvöfaldaði forystuna og Duvan Zapata setti fjórða markið.

Staðan var því orðin 4-1 eftir fyrri hálfleik og minnkaði Joao Pedro muninn enn frekar með laglegu marki í upphafi síðari hálfleiks.

Nær komust gestirnir þó ekki og innsiglaði varamaðurinn Sam Lammers sigurinn með laglegu marki á 81. mínútu þar sem hann fíflaði varnarmann Cagliari upp úr skónum með frábærum skærum.

Atalanta er með fullt hús stiga eftir þrjár umferðir á nýju tímabili og markatöluna 13-5. Cagliari er aðeins með eitt stig.