Mynd: EPA

Mynd: Getty Images

Salernitana er að framkvæma kraftaverk í ítalska boltanum. Liðið er komið úr fallsæti eftir fjórða sigurinn í síðustu fimm leikjum.

Liðið frá suðurhluta Ítalíu fékk fallbaráttulið Venezia í heimsókn úr norðri en Arnór Sigurðsson var fjarverandi vegna meiðsla.

Alvöru fallbaráttuslagur í Salerno þar sem Federico Bonazzoli skoraði fyrsta markið strax á sjöundu mínútu.

Heimamenn voru hættulegri en gestirnir frá Feneyjum voru ekki á því að gefast upp og fengu gott færi áður en Thomas Henry jafnaði leikinn á 58. mínútu.

Heimamenn gerðu tvöfalda skiptingu í kjölfarið þar sem Simone Verdi kom inn fyrir Bonazzoli og skoraði laglegt mark fimm mínútum síðar. 

Feneyingar reyndu að sækja jöfnunarmark en það gekk ekki sérlega vel og misstu þeir Ethan Ampadu af velli með rautt spjald undir lokin.

Ampadu fékk þá tvö gul spjöld fyrir tvö heimskuleg brot með 30 sekúndna millibili.

Venezia tókst ekki að jafna og er Salernitana komið úr fallsæti í fyrsta sinn á tímabilinu.

Salernitana er einu stigi fyrir ofan fallsvæðið þegar þrjár umferðir eru eftir. Venezia vermir botnsætið og fellur með tapi í næstu umferð.