Barcelona vann langþráðan sigur í spænsku deildinni er liðið tók á móti Real Betis í dag.

Ousmane Dembele gerði laglegt opnunarmark og klúðraði Antoine Griezmann vítaspyrnu í jöfnum fyrri hálfleik. Betis verðskuldaði jöfnunarmarkið sem Antonio Sanabria skoraði skömmu fyrir leikhlé. Lionel Messi kom inn í leikhlé og breytti leiknum.

Griezmann lét fyrirgefa sér vítaspyrnuklúðrið með marki í upphafi síðari hálfleiks en Messi lék stóran þátt í markinu með skemmtilegri gabbhreyfingu.

Varnarmaðurinn Aissa Mandi bjargaði svo á marklínu fyrir Betis en notaði hendina. Hann var því rekinn af velli og í þetta skiptið fékk Messi að stíga á punktinn og skoraði af miklu öryggi.

Loren minnkaði muninn aftur niður í eitt mark en Messi tvöfaldaði forystuna á nýjan leik eftir laglegt samspil við Sergi Roberto. Pedri gerði endanlega út af við leikinn með fimmta marki Börsunga á lokamínútunum.

Tíu leikmenn Betis réðu ekkert við Messi og félaga. Barca er komið með 11 stig eftir 7 umferðir, fimm stigum eftir Real Madrid.

Huesca 1 - 1 Eibar
0-1 E. Burgos ('38)
1-1 Rafa Mir ('67)

Fyrr í dag áttust Huesca og Eibar við í neðri hluta deildarinnar og úr varð mikill baráttuleikur.

Eibar leiddi í hálfleik en lokatölur urðu 1-1. Eibar er með 9 stig eftir 9 umferðir. Huesca er með 6 stig.