Búið er að opinbera 26 manna leikmannahóp Argentínu fyrir HM. Landsliðsþjálfarinn Lionel Scaloni velur fimm leikmenn sem spila í ensku úrvalsdeildinni.

Emi Martinez (Aston Villa), Cristian Romero (Tottenham), Lisandro Martínez (Man Utd), Alexis Mac Allister (Brighton) og Julian Alvarez (Man City) fengu kallið. Alvarez mun berjast um mínútur við Paulo Dybala og Lautaro Martínez. Hinn 21 árs gamli Enzo Fernandez, leikmaður Benfica, á fæsta landsleiki af þeim sem eru valdir eða tvo talsins.

Lionel Messi er að sjálfsögðu í hópnum, hann er á leið á sitt fimmta og líklega síðasta HM á ferlinum. Argentína hefur tvisvar orðið heimsmeistari, fyrst 1978 og svo aftur 1986. Argentína er í C-riðli ásamt Sádí-Arabíu, Mexíkó og Póllandi.

Giovani Lo Celso (meiddur) og Angel Correa eru sennilega stærstu nöfnin sem ekki eru valdir. Alejandro Garnacho (Man Utd), Manuel Lanzini (West Ham) og Emi Buendia (Aston Villa) fengu ekki heldur kallið.