Carlo Ancelotti þjálfari Napoli segist ekki ætla að tefla fram varaliði gegn Salzburg er liðin mætast í 16-liða úrslitum Evrópudeildarinnar í kvöld.
Napoli vann fyrri leikinn 3-0 á heimavelli og skoraði Arkadiusz Milik fyrsta mark leiksins en hann hefur verið í stuði og er kominn með 16 mörk á tímabilinu.
„Milik mun spila á morgun. Við erum ekki hér til að reikna út líkur, við erum hér til að vinna," sagði Ancelotti á fréttamannafundi.
Þetta er ekki í fyrsta sinn sem Salzburg mætir ítölsku liði í Evrópudeildinni en í fyrra slógu austurrísku meistararnir Lazio úr leik eftir að hafa tapað fyrri leiknum 4-2 í Róm.
„Undir lok fyrri leiksins gáfum við þeim of mikið pláss og þeir komust alltof nálægt því að skora útivallarmark. Þeir sýndu sitt rétta andlit og gætu átt stórleik á heimavelli."
Athugasemdir