Alex Þór í fyrsta landsleiknum.
Alex Þór Hauksson, miðjumaður Stjörnunnar, spilaði sinn fyrsta A-landsleik í dag. Alex kom inn á sem varamaður á 70. mínútu þegar Ísland gerði markalaust jafntefli við Eistland í vináttulandsleik í Katar.
Lestu um leikinn: Ísland 0 - 0 Eistland
„Ólýsanleg tilfinning, ég er þvílíkt sáttur að hafa fengið tækifæri. Ég er í skýjunum," sagði Alex Þór, sem er 19 ára gamall.
„Maður var alltaf úti á velli að ímynda sér að maður væri að spila fyrir landsliðið fyrir framan fulla stúku. Það er draumur að hafa náð því þó það sé ekki full stúku," sagði Alex en það kemur bara seinna hjá þessum efnilega leikmanni.
Alex og Willum Þór Willumsson voru lengi á hliðarlínunni að bíða eftir því að komast inn á, boltinn vildi ekki út af.
„Við vorum farnir að ræða það hvort þeir myndu halda boltanum út leiktímann, en eftir sjö mínútur fór hann loksins út af."
Alex og liðsfélagi hans, Hilmar Árni Halldórsson, missa af fyrsta leik Stjörnunnar í Fótbolta.net mótinu gegn FH í kvöld.
„Ég er svekktur að ná ekki fyrsta leik, en við Hilmar mætum klárir í næsta. Við verðum að vinna þetta mikilvægasta mót ársins," sagði Alex að lokum.
Viðtalið er í heild sinni í sjónvarpinu hér að ofan.
Athugasemdir
