„Þetta er fyrst og fremst mikið svekkelsi. Þetta er alls ekki byrjunin sem við ætluðum okkur," sagði Lovísa Guðrún Einarsdóttir, fyrirliði ÍR, eftir 8-2 tap gegn Fram í Lengjudeild kvenna í kvöld.
Lestu um leikinn: Fram 8 - 2 ÍR
ÍR náði forystunni snemma í leiknum en svo tók Fram algjörlega öll völd á vellinum.
„Það er mikil stemning í hópnum og þetta var mjög góð byrjun hjá okkur, en svo vorum við fljótar að fá skellinn."
„Við fáum tvö mörk á okkur með mínútu millibili og það var mjög erfitt að koma til baka eftir það. Við eigum að vera sterkari en þetta, en þetta gekk ekki í dag."
Hvernig er stemningin í klefanum eftir þetta tap?
„Hún er mjög súr en við komum til baka úr þessu. Það er bara upp með hausinn og áfram gakk," segir Lovísa en ÍR-ingar eru að koma upp sem nýliðar. Þeim er spáð neðsta sæti deildarinnar en þær ætla að afsanna þá spá.
„Við vitum alveg hvar okkur er spáð en við ætlum alls ekki að enda þar."
Hægt er að sjá viðtalið í spilaranum hér að ofan.
Athugasemdir
