Alfreð var í viðtali við heimasíðu þýska sambandsins og þar er rifjað upp þegar Ísland gerði markalaust jafntefli við Þýskaland á Laugardalsvelli 2003.

Alfreð var þá fjórtan ára gamall og var á vellinum. „Það var sterkt fyrir Þýskaland að ná 0-0 úr þeim leik," segir Alfreð kíminn í viðtalinu.

Setjum alltaf háleit markmið
Ísland heimsækir Þýskaland í Duisburg á fimmtudaginn í næstu viku en það er fyrsti leikur liðanna í undankeppni HM.

„Auðvitað teljum við Þýskaland sterkasta liðið í okkar riðli. Því miður höfum við ekki úr eins mörgum góðum leikmönnum að velja og Þýskaland. Það er alveg ljóst að þýska liðið er miklu sigurstranglegra en undanfarin ár hjá þýska landsliðinu hafa verið flókin," segir Alfreð.

Hann segir að erfitt sé að finna veikleika í þýska liðinu en í riðlinum eru einnig Armenía, Liechtenstein, Norður-Makedónía og Rúmenía.

„Liðið í fyrsta sæti fer beint á HM en liðið í öðru sæti fer í umspil. Okkar markmið er að enda í öðru af tveimur efstu sætunum. Við höfum aldrei verið hræddir við að setja okkur háleit markmið og breytum því ekki."

Á morgun verður haldinn fréttamannafundur þar sem landsliðshópur Íslands fyrir fyrstu þrjá leikina í undankeppni HM verður opinberaður.

FIMMTUDAGUR 25. MARS
19:45 Þýskaland - Ísland

SUNNUDAGUR 28. MARS
16:00 Armenía - Ísland

MIÐVIKUDAGUR 31. MARS
18:45 Liechtenstein - Ísland