Víkingur Ólafsvík hafði betur gegn Víkingi Reykjavík er liðin mættust í sannkölluðum Víkingaslag í 8-liða úrslitum Mjólkurbikarsins.

Leikurinn var afar bragðdaufur og var hvorugt liðið að koma sér í færi. Þegar allt stefndi á framlengingu náðu Ólsarar að pota inn sigurmarki rétt undir lokin.

Gonzalo Zamorano geystist þá upp hægri kantinn í góðri skyndisókn. Hann kom boltanum laglega á Sasha Litwin sem skoraði af stuttu færi.

Ólafsvíkingar mæta Breiðabliki í undanúrslitum Mjólkurbikarsins fimmtudaginn 16. ágúst. Leikið verður til úrslita 15. september á Laugardalsvelli. Stjarnan og FH mætast einnig í undanúrslitum.